Birlesken Milletler Shólkemi Azıq-awqat hám awıl xojalıǵı shólkeminiń (FAO) Ózbekstan Respublikasındaǵı wákilxanasınıń «Aralboyi aymaǵında hawa, jer hám suw resursların basqarıw boyınsha innovatsiyalıq sheshimler arqalı ekologiyalıq qáwiplerdi saplastırıw ushın jergilikli sherikler hám xalıqtıń bilim hám kónlikpelerin qáliplestiriw» qospa joybarı sheńberinde Moynaq, Qońırat hám Taxtakópir rayonlarında ekotizim jaǵdayın bahalaw, jergilikli xalıqtıń ekosistemanı asıraw boyınsha bilim hám kónlikpelerin asırıw, jasıl mákan hám toǵayzarlıqlar shólkemlestiriw hám bunda jergilikli xalıqtıń tikkeley qatnasıwın támiyinlew názerde tutılǵan.Atap aytqanda, Qońırat hám Taxtakópir rayonlarında 2 gektardan jámi 4 gektar maydanda jiyde náli egilip, kórgizbeli atız maydanların shólkemlestiriw joybarlastırılǵan.
Usı ilajlar sheńberinde Qońırat rayonında oqıw seminarı ótkerildi. Ilajda 30 dan artıq ekologiya, toǵay, suw, awıl xojalıǵı hám basqa mápdar shólkemler wákilleri, fermerler hám studentler qatnastı.Atız maydanında innovciyalıq usıl arqalı náller egiw, bunda suwdı únemlewshi texnologiyalar qatnasuvshılarǵa ámelde kórsetip ótildi.Ilajda xalıq aralıq hám jergilikli ekspertler qatnastı. Kúnniń birinshi yarımında teoriyalıq bilimler berilgen bolsa, kúnniń ekinshi yarımında tikkeley atızlarda jumıslar alıp barıldı.Bul sıyaqlı innovciyalıq sheshimler, ekosistemanı asıraw, toǵayzarlıqlar shólkemlestiriw, unamsız ıqlım ózgeriwi zıyanların kemeytiwge xızmet etedi.
