Ózbekstan Respublikası Prezidenti Shavkat Mirziyoev 10-iyun kúni Birlesken Arab Ámirlikleriniń húkimet jumısları boyınsha ministri Muhammad bin Abdulloh al-Gargaviy basshılıǵındaǵı delegaciyanı qabılladı.
Ózbekstan hám BAÁ arasındaǵı kóp qırlı birge ilsesiwdi jáne de rawajlandırıw hám onı jańa ámeliy mazmun menen bayıtıwdıń áhmiyetli máseleleri kórip shıǵıldı.
Ministr Muhammad al-Gargaviy mámleketimiz basshısına Ámirlikler Prezidenti Shayx Ol Nahayan hám BAÁ Bas ministri, Dubay ámirliginiń hákimi Shayx Muhammad ol Maktumnıń sálemi hám jaqsı tileklerin jetkerdi.
Birlesken Arab Ámirlikleri húkimeti Jańa Ózbekstanda ámelge asırılıp atırǵan keń kólemli reformalar hám jańalanıwlar baǵdarlamasın hár tárepleme qollap-quwatlap atırǵanı, onıń nátiyjeli ámelge asırılıwında zárúr járdemdi kórsetiwge tayar ekenligi atap ótildi.
Keyingi jılları Ózbekstan – BAÁ qatnasıqları jedel rawajlanıp baratırǵanın atap ótiw orınlı. Tovar almasıw kórsetkishleri hám investiciyalar kólemi óspekte. Sonıń ishinde, usı jıldıń basınan óz-ara sawda eki esege kóbeydi, mámleketimizde 45 jańa qospa kárxana shólkemlestirildi.
Ekonomikalıq birge islesiwdi muwapıqlastırıw hám ámelge asırıw boyınsha tásirsheń sistema tiykarında Ámirliklerdiń jetekshi kompaniyaları menen shólkemleriniń qatnasıwında investiciyalar kólemi derlik 3 milliard dollar bolǵan 17 iri joybar ámelge asırılmaqta.
«Mubadala» kompaniyası menen birgelikte Talimarjan ıssılıq elektr stanciyası quwatlıqların keńeytiw, «Masdar» kompaniyası menen bolsa elimiz aymaqlarında samal hám quyash elektr stanciyaların qurıw joybarları ámelge asırılmaqta.
Jetekshi «DP World» kompaniyası menen «Nawayı» multimodal xabı hám ekonomikalıq zonasın rawajlandırıw, sonday-aq, bajıxana hákimshiligi sistemasın modernizaciyalaw máseleleri islep shıǵılmaqta.
Bunnan tısqarı, awıl xojalıǵı, densawlıqtı saqlaw, logistika, sanlastırıw hám basqa da baǵdarlarda bir qatar iri joybarlar ámelge asırılmaqta.
Sóylesiwler waqtında mámleketlik basqarıw nátiyjeliligin arttırıw baǵdarındaǵı, «Bir million programmist» baǵdarlaması hám Sociallıq-ekonomikalıq reformalar akseleratorı jumısı sheńberindegi birge islesiwdiń ámeliy nátiyjeleri úlken qanaatlanıwshılıq penen atap ótildi.
Innovaciyalar hám jasalma intellekt tarawlarında birge islesiw, áhmiyetli tarmaqlardı reformalaw, mámleketlik basqarıwdı jáne de jetilistiriw hám zamanagóy kadrlardı tayarlaw boyınsha sóylesiwdi keńeytiw uzaq múddetli sherikliktiń jańa baǵdarları sıpatında belgilendi.
Qabıl etilgen qararlar hám ushırasıwda alǵa qoyılǵan baslamalardı tolıq ámelge asırıw boyınsha birgeliktegi «jol kartası»n qabıl etiwge kelisip alındı.
ÓzA