9-iyun kúni Ózbekstan Respublikası Prezidenti Shavkat Mirziyoev hám Yaponiya Bas ministri Fumio Kisidanıń telefon arqalı sóylesiwi bolıp ótti.
Kóp qırlı Ózbekstan–Yaponiya birge islesiwin bunnan bılay da rawajlandırıw hám keńeytiwge baylanıslı, sonday-aq, xalıqaralıq hám regionallıq áhmiyetke iye aktual máseleler kórip shıǵıldı.
Jetekshiler mámleketlerimiz arasında diplomatiyalıq qatnasıqlar ornatılǵanınıń 30 jıllıǵı hám Ózbekstan menen Yaponiya arasındaǵı strategiyalıq sherikliktiń 20 jıllıǵı menen bir-birin qızǵın qutlıqladı.
2019-jıl dekabr ayında Tokio qalasında ótken sammit hám joqarı dárejedegi turaqlı sóylesiwler eki tárepleme qatnasıqlardı sapa jaǵınan jańa dárejege alıp shıǵıp, olardı ámeliy mazmun menen bayıtqanı úlken qanaatlanıwshılıq penen atap ótildi.
Óz-ara sawda kólemi artıp barmaqta – usı jıldıń basınan tovar almasıw kórsetkishleri eki esege arttı. Yaponiya jetekshi kompaniyalarınıń ekonomikamızǵa tikkeley investiciyaları kóbeymekte, ekonomikanıń joqarı texnologiyalı tarmaqlarında kóplegen jańa qospa kárxanalar shólkemlestirilmekte. Energetika quwatlılıqların modernizaciyalaw hám keńeytiw, sanaatta, sonıń ishinde, mashina qurılısı hám ximiya tarmaqlarında zamanagóy óndirislerdi jaratıw, miymanxanalardıń infrastrukturasın rawajlandırıw boyınsha birgelikte iri joybarlar ámelge asırılmaqta. Paytaxtımızda Yaponiyanıń birinshi Sanlı universiteti jumıs alıp barmaqta.
Mámleketimiz basshısı Yaponiya Bas ministri hám Húkimetine Jańa Ózbekstanda ámelge asırılıp atırǵan artqa qaytpaytuǵın reformalardı hár tárepleme qollap-quwatlap atırǵanı ushın qızǵın minnetdarshılıq bildirdi. Yaponiyanıń JICA agentligi hám Xalıqaralıq birge islesiw banki – JBIC sheńberinde kórsetilgen finanslıq hám finanslıq-texnikalıq járdem kólemi 7 milliard dollardan artqanı atap ótildi.
Bunnan tısqarı, húkimet delegaciyalarınıń usı jılı ótkerilgen tabıslı ushırasıwı hám sóylesiwlerdiń nátiyjeleri joqarı bahalandı.
Jetekshiler innovaciyalar, «jasıl» ekonomika, sanlı texnologiyalar, ilim hám bilimlendiriw tarawlarında ámeliy birge islesiwdi jáne de keńeytiw hám joybarlardı alǵa qoyıw, mádeniy-gumanitarlıq almasıw baǵdarlamaları hám parlamentleraralıq sóylesiwdi dawam ettiriw áhmiyetli ekenin atap ótti.
Osaka qalasında ótkeriletuǵın «EKSPO-2025» pútkil dúnya júzilik kórgizbede Ózbekstannıń keń kólemli ekspoziciyasın shólkemlestiriwge kelisip alındı.
Sóylesiw waqtında xalıqaralıq kún tártibindegi máselelerge da toqtap ótildi.
Yaponiya Bas ministri mámleket BMSh Qáwipsizlik keńesine turaqlı aǵza bolıwı, Koreya yarım atawın yadrolıq qural-jaraqtan jıraq aymaqqa aylandırıw hám urlanǵan yapon puqaraların qaytarıw máselelerinde Ózbekstan bárqulla qollap-quwatlap atırǵanı ushın minnetdarshılıq bildirdi.
Ózbekstan Prezidenti Yaponiya tárepin Kumamoto qalasında Suw sammitiniń tabıslı ótkerilgeni menen qutlıqladı hám Yaponiya Húkimeti basshısı tárepinen keń regionımızda turaqlı rawajlanıwǵa erisiw maqsetinde alǵa qoyılǵan Aziyada ámeliy birge islesiwdiń tiykarǵı baǵdarların qollap-quwatlaytuǵının bildirdi.
Bas ministr Fumio Kisida, óz gezeginde, Ózbekstannıń Oraylıq Aziyada isenim, jaqsı qońsıshılıq hám keń kólemli sheriklik qatnasıqların bekkemlew baǵdarındaǵı baslamaların hám Awǵanstanda turaqlı tınıshlıq hám ekonomikalıq tikleniwdi támiyinlewge kórsetip atırǵan járdemin joqarı bahaladı.
«Oraylıq Aziya + Yaponiya» sóylesiwi sheńberinde óz-ara paydalı birge islesiwdiń pútkil potencialın iske qosıwdan eki tárep te mápdar ekeni atap ótildi.
Sóylesiw juwmaǵında Prezident Shavkat Mirziyoev Bas ministr Fumio Kisidanı mámleketimizge rásmiy sapar menen keliwge mirát etti.
Ózbekstan hám Yaponiya jetekshileriniń telefon arqalı sóylesiwi hár qashanǵıday ashıq, doslıq hám issheńlik ruwxında ótti.
ÓzA