Prezident Shavkat Mirziyoev 8-iyun kúni suw saqlaǵıshlardı modernizaciyalaw hám Surxandárya wálayatında ishimlik suwı támiynatın jaqsılaw joybarlarına baylanıslı prezentaciya menen tanıstı.
Dárya hám saylardıń suwı hám awıl xojalıǵı, hám energetika, hám xalıq turmısı ushın áhmiyetli dárek. Mámleketimizde bul bahalı jemis qásterlep saqlanıp, xalıqtıń mápine qaratılmaqta.
Usı maqsette 2017-jılı Prezident pármanı menen «Ózbekgidroenergo» akcionerlik jámiyeti shólkemlestirilgen edi. Ótken jılı jáne 4 suw saqlaǵısh usı jámiyet basqarıwına ótkerildi hám olar 6 ǵa jetti. Sırt el kompaniyaların tartqan halda hár bir suw saqlaǵıshtıń texnikalıq jaǵdayı úyrenip shıǵıldı hám keshiktirip bolmaytuǵın ońlaw ilajları belgilendi. Oǵan muwapıq, bógetler, suw alıw hám shıǵarıw imaratları ońlanbaqta, nasos agregatları tiklenbekte.
Prezentaciyada usı jumıslar hám aldıńǵı wazıypalar haqqında málimleme berildi.
Mámleketimiz basshısı barlıq suw saqlaǵıshlardı modernizaciyalaw arqalı qáwipsizlikti arttırıw, gidromexanikalıq úskeneler hám ólshew qurılmaların jańalap, sistemanı sanlastırıw boyınsha kórsetpeler berdi.
Bul arqalı barlıq jumıs procesi akcionerlik jámiyettiń situaciyalıq-tallaw orayına onlayn jalǵanadı hám jılına qosımsha 120 million kilovatt-saat elektr islep shıǵarıw imkaniyatı jaratıladı.
Bunnan tısqarı, Hisorak hám Ahangaran suw saqlaǵıshlarında jıllıq 22 million kilovatt saat quwatlıqtaǵı 2 jańa kishi GES qurıladı.
Kosmoslıq izertlewler hám texnologiyalar agentligine suw saqlaǵıshlardıń jaǵdayın monitoring etip, kosmoslıq súwretler hám maǵlıwmatlar menen támiyinlew tapsırıldı.
Kishi gidro elektr stanciyalarınıń qurılısına jeke menshik sektordı tartıw, joqarı maǵlıwmatlı hám orta buwın qánigelerin tayarlaw wazıypaları da kórsetip ótildi.
Xalıqtıń turmıs sapası hám salamatlıǵı faktorlarınan biri – taza ishimlik suwı. Biraq házirgi kúnde Surxandárya xalqınıń tek ǵana 58 procenti oraylasqan ishimlik suwı menen támiyinlengen. Wálayattıń qubla rayonları hám Termiz qalasında suw mineralizaciyası joqarı.
Sonıń ushın Prezidentimiz ótken jılı Twpalang suw saqlaǵıshınan tarmaq tartıw baslamasın alǵa qoyǵan edi. Bul boyınsha joybar islep shıǵılıp, iske kirisildi. Házirgi kúnge shekem 47 kilometr qubır tartılıp, ishimlik suwı Sariosiyo orayına shekem alıp barıldı. Jıldıń aqırına shekem Denau hám Shorshı rayonlarına jetkeriw rejelestirilgen.
Joybarǵa bola, bir sutkada 200 mıń kub metr suw tazalaw imaratı, derlik 400 kilometr magistral qubır tartıladı. Nátiyjede aymaq xalqın taza ishimlik suwı menen támiyinlew 90 procentke jetedi.
Mámleketimiz basshısı onıń ushın rayon hám máhálleler ishindegi qubırlardı da tiklew, jańa tarmaqlar qurıw hám sapalı xızmetti jolǵa qoyıw zárúr ekenligin atap ótti.
ÓzA