8-iyun kúni Ózbekstan Respublikası Prezidenti Shavkat Mirziyoev mámleketimizde sapar menen bolıp turǵan Birlesken Milletler Shólkemi Bas xatkeriniń birinshi orınbasarı Amina Muhammad penen ushırasıw ótkerdi.
Dúnyanıń bas xalıqaralıq shólkemi delegaciyası quramındaǵı ushırasıwda BMSh Evropa ekonomikalıq komissiyasınıń basshısı Olga Algaerova hám BMSh Rawajlanıw baǵdarlamasınıń Ózbekstandaǵı turaqlı koordinatorı Roli Astxana da qatnastı.
Mámleketimizde Turaqlı rawajlanıw maqsetlerin ámelge asırıw sheńberinde BMShtıń institut hám orayları menen kóp qırlı hám nátiyjeli birge islesiwdi jáne de keńeytiwdiń áhmiyetli máseleleri kórip shıǵıldı.
Delegaciya basshısı Ózbekstan jetekshisine shólkem Bas xatkeri Antoniu Guterrishtiń qızǵın sálemin hám eń jaqsı tileklerin jetkerdi. Atap ótilgenindey, BMSh mámleketimiz tárepinen ámelge asırılıp atırǵan ashıq hám pragmatikalıq siyasattı, sonday-aq, Jańa Ózbekstandı qurıwǵa qaratılǵan hám 2030-jılǵa shekem turaqlı rawajlanıw tarawındaǵı global kún tártibiniń tiykarǵı wazıypalarına tolıq sáykes bolǵan túpkilikli reformalar baǵdarlamasın joqarı bahalaydı.
Búgingi kúnde Ózbekstan BMShtıń barlıq strukturaları menen jedel birge islespekte – birgelikte hár qıylı baǵdarlarda 200 den aslam joybarlar ámelge asırılmaqta. Mámleketimiz BMShtıń Insan huqıqları boyınsha keńesiniń aǵzası.
Keyingi jılları Ózbekstannıń baslaması menen shólkem Bas Assambleyasınıń bir qatar áhmiyetli arnawlı rezolyuciyaları qabıl etildi. Bunnan tısqarı, ekologiyalıq innovaciyalar hám texnologiyalar aymaǵı dep járiyalanǵan Aralboyı regionı boyınsha BMSh Trast fondı shólkemlestirildi.
BMSh Rawajlanıw baǵdarlaması, Evropa ekonomikalıq komissiyası, Jáhán densawlıqtı saqlaw shólkemi, YuNESKO, YuNIDO, FAO, global shólkemniń basqa da strukturaları menen ámeliy birge islesiw keńeymekte.
Ushırasıwda jedel sóylesiw hám almasıwlardı dawam ettiriw, Ózbekstanda Turaqlı rawajlanıwdıń, bárinen burın, xalıqtıń turmıs sapasın jaqsılaw hám abadanlıǵın joqarılatıwǵa qaratılǵan tiykarǵı maqsetleriniń orınlanıwın támiyinlew ushın birge islesiwdi bekkemlew hám birgeliktegi ilajlardı ámelge asırıwǵa ayrıqsha itibar qaratıldı.
Kámbaǵallıqtı qısqartıw, azıq-awqat qáwipsizligin támiyinlew, densawlıqtı saqlaw hám bilimlendiriw tarawlarında keń kólemli reformalardı ámelge asırıw, gender teńlik boyınsha milliy strategiyanı ámelge asırıw, «jasıl» energetikanı jedel rawajlandırıw, innovaciyalar hám sanlı texnologiyalardı engiziw, infrastrukturanı modernizaciyalaw hám basqa da máseleler jáne bir márte sherikliktiń tiykarǵı tarawları sıpatında atap ótildi.
Xalıqaralıq siyasat máseleleri hám regionallıq mashqalalar boyınsha da pikir alısıldı.
BMSh Bas xatkeriniń birinshi orınbasarı Amina Muhammad Oraylıq Aziya mámleketleri regionda doslıq, jaqsı qońsıshılıq, isenim hám sheriklik qatnasıqların bekkemlewde úlken tabıslarǵa eriskenin úlken qanaatlanıwshılıq penen atap ótti.
Ózbekstannıń Awǵanstanda turaqlı tınıshlıqtı támiyinlewge hám bul mámlekettiń sociallıq-ekonomikalıq tikleniwine, sonıń ishinde, iri transport hám energetika joybarların ámelge asırıw arqalı járdemlesiw baǵdarındaǵı háreketlerin qollap-quwatladı.
Sóylesiwler juwmaǵında Ózbekstan Respublikasınıń Birlesken Milletler Shólkemi institut hám strukturaları menen keń kólemli birge islesiwin qabıl etilgen «jol karta»ları tiykarında jáne de rawajlandırıw boyınsha birgeliktegi ilajlar kompleksin ámelge asırıw boyınsha kelisimge erisildi.
ÓzA