Ózbekstan Respublikası Prezidenti Shavkat Mirziyoevtiń basshılıǵında 7-iyun kúni xızmetler kórsetiwdi rawajlandırıw máselelerin dodalaw boyınsha videoselektor májilisi ótkerildi.
Xızmetler – az qárejet penen kóp xalıqtıń bántligin támiyinlewge bolatuǵın taraw. Sonlıqtan aymaqlarda turmıslıq xızmet úyleri shólkemlestirilmekte, jumıssızlar kásip-ónerge úyretilmekte, qarjı hám sharayat penen támiyinlenbekte.
Usı jıl 27-yanvarda mámleket basshısınıń «Xızmetler tarawın rawajlandırıwǵa baylanıslı qosımsha ilajlar haqqında»ǵı qararı qabıl etildi. Oǵan muwapıq, bul tarawǵa kóplegen jeńillikler berildi hám qolaylı resurslar ajıratıldı.
Bular arqalı bıyıl 120 mıńnan aslam jańa joybarlardı ámelge asırıp, xızmetlerdiń kólemin 435 trillion sumǵa jetkeriw rejelestirilgen.
Sın kóz-qarasta ótken májiliste bul baǵdarda aymaqlarda orınlanǵan jumıslar talqılandı.
Hákimler xalıqtı oylap, hadal islep, isbilermenlerge jer, imarat hám infrastruktura máselesinde járdem bergen jerlerde nátiyje bolǵan. Máselen, Tashkent qalası, Samarqand, Ferǵana hám Ándijan wálayatlarında mıńlaǵan jumıs orınları ashılǵan.
Yanvar-may aylarında xızmetler tarawında 232 mıń jumıs ornı jaratılǵan. Biraq, Jizzaq, Nawayı, Xorezm hám Qashqadárya wálayatlarında bul baǵdardaǵı nátiyjeler tómen.
Keyingi eki ayda xızmet orınların shólkemlestiriw ushın 12 mıń jer maydanı aukcionǵa qoyılǵan. Biraq 27 rayonda sawdaǵa shıǵarılǵan maydanlar sanı 10 ǵa da jetpegen.
Sol sebepli bunday bosańlıqqa jol qoyǵan qala hám rayon hákimleri, olardıń qurılıs boyınsha orınbasarlarına itnizamıy jaza sharaları belgilendi.
Xızmetler tarawın rawajlandırıw boyınsha 9 ay hám jıl juwmaǵına shekemgi rejeler dodalanıp, Buxara tájiriybesi bul boyınsha úlgi etip kórsetildi.
Mısalı Buxara qalasındaǵı isbilermenler miymanxana, asxana, sawda dúkanlarınıń tóbesinde restoran hám kafeteriyler shólkemlestirgen. Jeńillikli kreditlerdiń nátiyjeliligi tallanǵanda, bir jumıs ornın ashıwǵa ortasha 8-9 million sum ǵana ketken.
Juwapkerlerge bul tájiriybeni basqa qala hám rayon oraylarında da engiziw, onda qáwipsizlik talapları jáne ijaraǵa beriw shártlerin islep shıǵıw wazıypası qoyıldı.
Ulıwma, elimizde xalıqqa qolaylı hám transport qatnawı kóp joldıń boylarında mámleketlik uyımlardıń balansındaǵı 4 mıńǵa shamalas hákimshilik imarat jaylasqan. Usı imarat hám obektlerden de servis tarawında nátiyjeli paydalanıw múmkin ekeni atap ótildi.
Xızmet shaqapshaların shólkemlestiriwge, bárinen burın, qolaylı orın kerek. Sonlıqtan májiliste jáne 25 mıń jer maydanları servis hám sawda obektleri ushın aukcionǵa shıǵarılatuǵını belgilendi.
Bul baǵdarda xalıqqa bunnan bılay da qolaylılıq jaratıw ushın jerlerdi aukcionǵa qoyıw procesi ijara boyınsha 48 kúnnen 15 kúnge, múlk huqıqında 74 kúnnen 20 kúnge qısqartıladı. Jer maydanları bahalaw ekspertizasınan ótkerilmeydi, haqıyqıy bahası aukcionda anıqlanadı.
Sonıń menen birge, 2023-jıl 1-yanvardan baslap, jerlerdi aukcionǵa shıǵarıwda kadastr uyımlarında bar maǵlıwmatlardı basqa uyımlar menen kelisiw tártibi biykar etiledi. Barlıq ministrliklerdiń kadastr maǵlıwmatları Milliy geomálimleme sistemasına kirgiziledi.
Usı jıldıń 1-sentyabrine shekem 205 rayon hám qalada 253 arnawlı sawda hám xızmet kórsetiw kóshelerin shólkemlestiriw rejelestirilgen. Bul maqsetlerge ótken jılı respublika byudjetinen 1 trillion 400 milliard sum, bıyıl bolsa 900 milliard sum ajıratılǵan.
Máselen, Jizzaq qalasınıń «Jizzaqlı» máhállesindegi jabıq kóshe Sharaf Rashidov oraylıq kóshesine tutasıp, sawda hám servis shaqapshalarına kúni-túni jumıs islewge ruxsat berilgen. Nátiyjede biznes rawajlanıp, 200 jumıs ornı payda bolǵan.
Wálayat hákimlerine qala hám rayonlarda sonday kósheler shólkemlestirip, servisti rawajlandırıw boyınsha kórsetpeler berildi.
Yamasa jáne bir mısal: Baysındaǵı belgili Omanxana sanatoriyasınıń átirapında 3 miymanxana bar. Biraq orın jetpewiniń sebebinen miymanlardı awıldaǵı úyler qabıllaydı. Eger bul sanatoriyǵa alıp baratuǵın jol jaqsılansa, miymanlardıń sanı jáne de kóbeyiwi, jol boyında 200 den aslam sawda hám xızmet kórsetiw obektleri shólkemlestiriliwi múmkin. Sonlıqtan, juwapkerlerge Omanxana awılın rawajlandırıw boyınsha kórsetpeler berildi.
Usınday qatnas jasaw tiykarında, sırt elli konsalting kompaniyalardı hám ekspertlerdi tartıp, 28 qala hám xızmet potencialı joqarı 10 rayonnıń «master rejesi»n islep shıǵıw wazıypası qoyıldı.
Prezident kóshpeli hám jeńil konstrukciyalı sawda jumısı ushın talaplardı jeńilletiw zárúrligin atap ótti.
Sonıń ishinde, turaq jay múlk iyeleri shirketleri, máhálle, abadanlastırıw hám jol shólkemlerine óz aymaǵında máwsimlik kafe hám sawda orayların shólkemlestiriwge ruxsat beriledi. Bul arqalı derlik 50 mıń xalıqtıń bántligi támiyinlenedi.
Májiliste transport tarawına jeke investorlardı tartıw, xızmetlerdiń túrin kóbeytiw, Avtomobil jolları komitetiniń jumısın transformaciyalaw máselelerine de itibar qaratıldı.
Mámleketimiz basshısı jaqında máhállelerde bolıp ótken saylawlarǵa da toqtap ótip, baslıqlardı saylanǵanı menen qutlıqladı.
– Elge bas bolıw bul – úlken juwapkershilik. Máhálle baslıqları elimizdegi reformalardı hár bir shańaraqqa jetkeriwde, adamlardıń talabın hákimlerdiń aldına qoyıp, xalqımızdı razı etiwde jetekshi bolıwı zárúr. Búgin xızmetler tarawın rawajlandırıw boyınsha qoyılǵan anıq máseleler de bárinen burın máhálleden baslanıwı kerek, – dedi Shavkat Mirziyoev.
Májiliste Bas ministrdiń orınbasarları, ministrler, hákim hám hákim járdemshileri shıǵıp sóylep, reje hám usınısların bildirdi.
ÓzA