9-iyun kúni Ózbekstan Respublikası Oliy Majlisi Senatı, Qaraqalpaqstan Respublikası Ministrler Keńesi, Shańaraq hám hayal-qızlar mámleketlik komiteti, Hayal-qızlardı qollap-quwatlaw mámleketlik maqsetli qorı, AK Xalıq banki menen birgelikte Qaraqalpaqstan Respublikasında «Hayal-qızlar hám jaslar hápteligi»ne start berildi.
Hápteliktiń maqseti – ótkerilgen ilajlar dawamında hayal-qızlardıń jámiyetlik-siyasiy belsendiligin arttırıw, jaslar hám hayal-qızlardı isbilermenlikke keńnen tartıw, bántligin támiyinlew, sonday-aq, Qaraqalpaqstan tájiriybesin basqa wálayatlarǵa da kórsetiwden ibarat.
Nókis qalasındaǵı «Jaslar orayı»nda hápteliktiń ashılıw máresimi ótkerildi.
Onda Ózbekstan Respublikası Oliy Majlisi Senatınıń komitet baslıǵı Baxtiyor Sayfullaev, Senattıń shańaraq hám hayal-qızlardı qollap-quwatlaw hám gender teńligi máseleleri bóliminiń baslıǵı Nodira Shotursunova hám basqalar shıǵıp sóylep, Prezidentimiz tárepinen hayal-qızlardı qollap-quwatlaw baǵdarında ámelge asırılıp atırǵan reformalarǵa keńnen toqtap ótip, háptelik sheńberinde hayal-qızlardıń bántligin úyreniw, olardıń baslamaların ámelge asırıwda payda bolıp atırǵan mashqalalardı sheshiw boyınsha pikir-usınıslar tıńlanatuǵını, arnawlı akciyalar hám basqa da bir qatar ilajlar ámelge asırılatuǵınlıǵı málim etildi.
Qatnasıwshılar ónermentshilik ónimleriniń hám qaraqalpaq milliy kiyimleriniń modalar kórgizbesin tamashalap, pikirlerin bildirdi.
Soń Ózbekstan Respublikası Oliy Majlisi Senatı, Qaraqalpaqstan Respublikası Ministrler Keńesi, Shańaraq hám hayal-qızlar mámleketlik komiteti, Hayal-qızlardı qollap-quwatlaw mámleketlik maqsetli qorı, AK Xalıq banki wákilleriniń qatnasıwında mámleketlik emes kommerciyalıq emes shólkemlerdiń wákilleri menen dógerek sáwbeti ótkerildi.
Dógerek sáwbetin Qaraqalpaqstan Respublikası Ministrler Keńesi baslıǵınıń orınbasarı – Shańaraq hám hayal-qızlar komitetiniń baslıǵı Maryam Ahmedova alıp bardı.
Onda bayanatshılar tárepinen respublikamızda jasap atırǵan hayal-qızlardıń mashqalaların sheshiw, olardı sociallıq jaqtan qollap-quwatlawdı ele de kúsheytiw, hayal-qızlardıń jumıslarında dus kelip atırǵan tosqınlıqlar hám mashqalalardı sheshiw boyınsha pikir-usınıslar bildirildi. Hayal-qızlar hám jaslar isbilermenligi, olarǵa berilip atırǵan jeńillikler, jaratılǵan qolaylıqlar, respublikamızda hayal-qızlardıń mashqalaların sheshiw, olardı sociallıq qollap-quwatlawda mámleketlik emes kommerciyalıq emes shólkemlerdiń qatnası tuwralı maǵlıwmatlar berildi.
Sonday-aq, dógerek sáwbetinde, qánigeler tárepinen hayal-qızlardı qollap-quwatlaw mámleketlik maqsetli qorı jumıslarınıń baǵdarları atap ótilip, mámleketlik emes kommerciyalıq emes shólkemlerdiń wákilleri ushın grantlar ajıratıwǵa baǵıshlanǵan prezentaciya ótkerildi. Kóterilip atırǵan máselelerdiń unamlı sheshiliwinde mámleketlik emes kommerciyalıq emes shólkemler belsene qatnasıp, birge islesiw jolǵa qoyılsa kóbirek nátiyjelerge erisiletuǵınlıǵı atap ótilip, ajıratılıp atırǵan grantlardan utımlı, nátiyjeli, maqsetli paydalanıw boyınsha pikir-usınıslar bildirildi.
Kúnniń ekinshi yarımında isbilermen hayal-qızlar, sonday-aq, qusshılıq hám jumıstı úyge bólip alıp islew baǵdarları boyınsha grantlar ajıratıw maqsetinde isbilermen bolıwdı qálewshi hayal-qızlar menen ushırasıw, isbilermen hayal-qızlardıń jumıs orınlarına barıp, olardıń jumısları, mashqalaları, pikir-usınısları menen tanısıw, densawlıǵın tiklewde sociallıq járdemge mútáj shańaraqlarda bolıp, nawqaslardıń jaǵdaylarınan xabar alıw hám olarǵa qarjılay járdem kórsetiw ilajları ámelge asırıldı.
Á.Jiemuratov,
Qaraqalpaqstan xabar agentligi