Qaraqalpaqstan Respublikasında jaylasqan 220 kV kúshleniwli «Beruniy» podstanciyasında «Qaraqalpaqstan magistral elektr tarmaqları» filialınıń injener qánigeleri tárepinen elektr energiyasına bolǵan talaptıń artıwına baylanıslı jobadaǵı ońlaw, qurılıs-montaj jumısları alıp barılmaqta. Bul haqqında Energetika ministrligi xabar berdi.
Usı podstanciyadaǵı quwatlılıǵı 125 MVA bolǵan AT-1 transformatorı Qaraqalpaqstan Respublikasınıń úsh rayonı – Beruniy, Tórtkúl hám Ellikqala rayonların elektr energiyası menen turaqlı támiyinlewde áhmiyetli faktor bolıp tabıladı.
2021-jılǵa shekem 220 kVlıq «Beruniy» podstanciyasında 90 procentten joqarı júkleme menen islep atırǵan 1 dana 125 MVAlıq AT-1 transformatorı bolǵan. Onıń qasına quwatlılıǵı 125 MVA bolǵan AT-2 – ekinshi transformator ornatılıp, AT-1 transformatorınıń júklemesi normaǵa keltirildi. Bul bolsa elektr támiynatı boyınsha jobalastırılǵan kórsetkishlerdi orınlaw imkaniyatın berdi.
Bunıń nátiyjesinde Beruniy, Tórtkúl hám Ellikqala rayonlarında gúz-qıs máwsimlerindegi elektr támiynatında júz beriwi múmkin bolǵan sheklewlerdiń aldı alındı. Jumıs islep turǵan óndirislik kárxanalardıń quwatlılıǵınıń artıwı nátiyjesinde elektr támiynatı bekkemleniwiniń artıwına erisildi.
Islam Matekov,
Qaraqalpaqstan xabar agentligi.