Berdaq atındaǵı Qaraqalpaq mámleketlik universiteti Kórkem óner fakultetiniń reńli súwret qánigeligi 2-kurs studenti Rasul Serimbetovtıń jeke kórgizbesi shólkemlestirildi.
Kórgizbege onıń hár qıylı janrdaǵı 30 dan aslam shıǵarmaları qoyıldı.
Kórgizbeniń ashılıw máresiminde Berdaq atındaǵı Qaraqalpaqstan ádebiyatı tariyxı mámleketlik muzeyinin direktorı Shárigúl Payzullaeva, Ózbekstan kórkem akademiyası Qaraqalpaqstan bóliminiń baslıǵı Axmet Xojambergenov, fakultet dekanınıń jaslar menen islesiw máseleleri boyınsha orınbasarı Ikram Jumaniyazov hám basqalar shıǵıp sóylep, student R.Serimbetovtıń dóretiwshilik jumıslarına ayrıqsha baha berdi.
Atap ótilgenindey, R.Serimbetov usı kúnge shekem óziniń jaqsı minezi, miynet súygishligi menen qatarlarına úlgi bolıp, universitet tárepinen shólkemlestirilgen bir qatar mádeniy-aǵartıwshılıq ilajlarda, tańlawlarda belsene qatnasıp, jeńimpazlar qatarınan orın iyelep kelmekte.
– Rasul jaqsı oqıp, úlgili minezi menen kózge túsip kelmekte,-deydi onıń ustazlarınıń biri kafedra aǵa oqıtıwshısı J.Abatov. – Ol hár qıylı tańlawlarǵa belsene qatnasıp, máselen Nawrız bayramı múnásibeti menen unversitette «Hár kúniń Nawrız bolsın» atamasında ótkerilgen kórgizbeli tańlawda «Eń jaqsı súwretlew óneri shıǵarması» nominaciyası boyınsha ekinshi, «Watannıń rawajlanıwına meniń úlesim» tańlawınıń Nókis qalalıq basqıshında «Súwretlew hám ámeliy kórkem óner» baǵdarı boyınsha birinshi orındı iyelep, respublikalıq basqıshqa jollama aldı. Basqa da tańlawlarda sıylı orınlardı iyelep kelmekte.
Biz de ustaz sıpatında onıń jetiskenliklerinen quwanıp, onıń aldaǵı oqıwlarında, dóretiwshilik jumıslarında tasqın tabıslar bolıwına tileklespiz.
M.Qasımova,
QMU jurnalistika baǵdarınıń 3-kurs studenti.
Qaraqalpaqstan xabar agentligi.
M.Habibullaevtıń túsirgen súwretleri