Qońırat rayonı Ádillik bólimi Mámleketlik xızmetler orayı tárepinen 2022-jıl dawamında oray tárepinen kórsetilgen xızmetler, jetisken jetiskenlikler sonıń menen bir qatarda birge islesiwshi uyımlar tárepinen arzalarda jol qoyılǵan qáte kemshilikler múddet buzılıw halatları sıyaqlı bir qansha qáte kemshilikler boyınsha, birge islesiwshi uyım qániygeleri menen ushırasıw shólkemlestirildi. Ushırasıwda Qońırat rayonı Ádillik bólimi Mámleketlik xızmetler orayı direktorı B.Matniyazov sózge shıǵıp jıynalǵanlarǵa óziniń bayanatın oqıp esittirdi.
Qaraqalpaqstan Respublikası Ministrler Keńesi tárepinen tastıyıqlanǵan «Qaraqalpaqstan Respublikasında 2022-jılı jańadan shólkemlestirilgen kishi biznes subyektleriniń reje grafigi»niń orınlanıwı boyınsha, Qońırat rayonı Ádillik bólimi MXO tárepinen 2022-jıl dawamında jámi 342 yuridikalıq, 228 fizikalıq shaxs mámleketlik dizimnen ótip búgingi kúnde óz isbilermenlik háreketi menen shuǵıllanbaqta.
Isbilermenlik subyektlerin qayta dizimnen ótkeriwde 2022-jıl dawamında 317 isbilermenlik subyektleri qayta dizimnen ótkerilgen bolıp, bul korsetkish 214 yuridikalıq shaxs, 103 jeke tártiptegi isbilermenlerdi quraydı.
Ótken 2022-jıl dawamında oray tárepinen fizikalıq hám yuridikalıq shaxslarǵa jámi 50 mıńnan aslam mámleketlik xızmetler kórsetilgen bolsa,bul mámleketlik xızmetler sanınıń kórsetkishi jıldan jılǵa asqanınan derek beredi.
Rayon orayınan alıs aymaqlarǵa shıǵıw arqalı puqaralardıń waqıtların tejew hámde olardıń uzaǵın jaqın qılıw, sonıń menen birge imkániyatı sheklengen puqaralarǵa qolaylıqlar jaratıw, puqaralarımızǵa tarawımızǵa tiyisli bolǵan normativ-huqıqıy hújjetlerdiń mazmun-mánisin túsindiriw maqsetinde olardıń jasap turǵan orınlarına barǵan halda, 2022-jıl dawamında 3637 kóshpeli mámleketlik xızmetler kórsetildi. Sonday aq birge islesiwshi uyımlar tárepinen arzalarda jol qoyılǵan qáte kemshilikler múddet buzılıw xalatları da joq emes álbette. Joqarıdaǵılardan kelip shıǵip oray direktorı tárepinen jıynalǵanlarǵa aldaǵı waqıtta bunday qáte kemshiliklerge jol qoymaw hám arzalardı óz múddetinde orınlanıwın támiyinlew boyınsha aytıp ótildi
Qońırat rayonı Ádillik bólimi Mámleketlik xızmetler orayı