Qońırat rayonı hákimliginde “Qaraqalpaqstan” baspasınan joqarı sapada basılıp shıqqan “Qaraqalpaq tiliniń túsindirme sózligi” kitabınıń VII tomın rayondaǵı mákeme kárxana hám shólkemlerge tanıstırıwǵa baǵıshlanǵan seminar bolıp ótti. Seminarǵa rayon hákimligi xızmetkerleri hám ayırım mákeme qánigeleri qatnastı.
Rayon hákiminiń mámleketlik til máseleleri boyınsha másláhátshisi R.Aybergenova shıǵıp sóylep, jańa baspadan shıqqan “Qaraqalpaq tiliniń túsindirme sózligi” kitabınıń VII tomlı kitabı menen tanıstırdı.
Atap ótilgenindey, milliy mádeniyatımız benen mánawiyatımızdı rawajlandırıwda, onıń joqarı dárejelerge erisiwinde ana tilimizdiń tutqan ornı ayrıqsha áhmiyetke iye, Sońǵı jılları ana tilimizdi saqlawǵa, onı bunnan bılay da bayıtıwǵa mámleketlik siyasat dárejesinde itibar qaratılıp, bul baǵdarda iygilikli isler ámelge asırılmaqta. Sonıń ishinde Qaraqalpaq tiline mámleketlik til biyliginiń beriliwi, “Mámleketlik til haqqında”ǵı Nızamnıń qabıl etiliwi qaraqalpaq tili tariyxında jańa basqıshtı baslap berdi.
“Qaraqalpaq tiliniń túsindirme sózligi” birinshi márte 1982-1992-jılları Ózbekstan Ilimler akademiyası Qaraqalpaqstan filialınıń N.Dawqaraev atındaǵı tariyx, til hám ádebiyat institutınıń sózlik hám terminologiya bólimi tárepinen tayarlanıp, tórt tomlıq járiyalandı. Mine birinshi tom járiyalanǵanlı berli 40 jılǵa shamalas waqıt ótti.
Til janlı organizm sıyaqlı bárqulla rawajlanıp hám bayıp baradı. Tildiń rawajlanıw barısında onıń sózlik quramı basqa tarawlarǵa salıstırǵanda tez, sezilerli hám úlken ózgerislerge ushıraydı. Jámiyetlik-siyasiy, mádeniy hám ekonomikalıq turmıstaǵı ózgerisler birinshi gezekte tildiń sózlik quramında óz sáwleleniwin tabadı. Usı ótken waqıt ishinde qaraqalpaq tili leksikasında júz bergen ózgerisler esapqa alınsa, bul sózliktiń jańa tolıqtırılǵan baspasın jaratıw waqtı kelgeni hám bul búgingi kúnniń talabı ekennligi seziledi.