Ózbekstan mámleketlik konservatoriyası – 85 jasta
Ózbekstan mámleketlik konservatoriyası shólkemlestirilgenine 85 jıl toldı. Bul kórkem óner dárgayı ózbek hám dúnya muzıkasın úgit-násiyatlaw, taraw ushın joqarı intellektuallıq potenciallı, qábiletli sazendelerdi jetistiriwde áhmiyetli rol atqarmaqta.
Paytaxtımızda bul joqarı muzıka oqıw dárgayı shólkemlestirilgeniniń 85 jıllıq yubileyi ShBShǵa aǵza mámleketler muzıkalıq joqarı bilimlendiriw mákemeleri rektorlarınıń birinshi forumı menen sáykes túrde ótkerildi. Onıń sheńberindegi ánjuman, dóretiwshilik sóylesiw hám ushırasıwlar, iri forumlardıń ózine tán juwmaǵı sıpatında ashıq aspan astındaǵı koncert ilaj qatnasıwshıları, elimizde jumıs alıp barıp atırǵan sırt elli diplomatiyalıq korpus hám xalıqaralıq shólkemlerdiń wákilleri, muzıkatanıwshılar, kompozitorlardı ózine tarttı.
Mámleketimiz basshısınıń Ózbekstan mámleketlik konservatoriyası shólkemlestirilgenine 85 jıllıǵı múnásibeti menen qutlıqlawın Ózbekstan Respublikası Prezidenti Administraciyası basshısınıń orınbasarı – Ózbekstan Respublikası Prezidentiniń Baspasóz xatkeri Sherzod Asadov oqıp esittirdi.
Ózbekstan mámleketlik konservatoriyası orınlı túrde Oraylıq Aziyadaǵı eń áyyemgi joqarı muzıka bilimlendiriwi mákemesi ekenligin atap ótiw kerek. Bul bilim dárgayı kóp jıllar dawamında regiondaǵı birden-bir muzıka joqarı bilimlendiriw mákemesi bolǵan. Konservatoriya tariyxı júdá bay hám mazmunlı. Bul jerde Ózbekstan muzıka mádeniyatınıń kóplegen belgili ǵayratkerleri, professional kórkem óner hám muzıka iliminiń kórnekli wákilleri islegeni dıqqatqa ılayıq.
Ótken jıllar dawamında bul joqarı bilimlendiriw dárgayında milliy hám jáhán muzıka kórkem ónerin tolıq úyreniw, úgit-násiyatlaw, bul baǵdarda tereń izertlewler alıp barıw boyınsha ózine tán platforma jaratıldı, desek aljaspaymız. Ustaz kompozitorlar Muxtar Ashrafiy, Yunus Rajabiy, Georgiy Mushel, Turǵun Alimatov, Zohid Haqnazarov, Ofeliya Yusufova, Saodat Qobulova, Ilyos Akbarov hám jáne kóplegen pidayı muzıkashılarımız, ilimpazlarımız bul bilim dárgayınıń abırayın arttırıwda, jańa qábilet iyelerin anıqlawda hám ashıwda múnásip úles qostı.
Bul joqarı oqıw ornın tamamlaǵan qánigeler, muzıkashılar, dirijyorlar klassikalıq hám milliy muzıka tarawında elimizde jáne kóplegen sırt mámleketlerde nátiyjeli pedagogikalıq, dóretiwshilik jumıs alıp barmaqta. Házirgi waqıtta Ózbekstan mámleketlik konservatoriyasınıń talapları dúnyadaǵı abıraylı xalıqaralıq tańlawlar, kórkem óner festivallarında tabıslarǵa erispekte.
Keyingi jıllarda mámleketimiz basshısınıń baslaması menen jańa baǵdarda bilim beretuǵın bir qatar muzıkalıq joqarı oqıw orınları shólkemlestirildi, ámeldegilerindegi sharayatlar zaman talapları dárejesine keltirilmekte.
Yunus Rajabiy atındaǵı Ózbek milliy muzıka kórkem óneri institutı, Ózbekstan mámleketlik konservatoriyası janındaǵı Batır Zakirov atındaǵı Milliy estrada kórkem óneri institutı hám basqa da bir qatar kórkem óner bilimlendiriw dárgayları, áne, usı joqarı oqıw ornı negizinde payda bolǵan aǵartıwshılıq negiz tiykarında qáliplesti, desek qátelespeymiz.
ShBShǵa aǵza mámleketler muzıkalıq joqarı oqıw orınları rektorlarınıń birinshi forumınıń qatnasıwshıları Ózbekstan mámleketlik konservatoriyası mısalında elimizde muzıka bilimlendiriwine qaratılıp atırǵan ámeliy itibar menen tanıstı. Aytıp ótiw kerek, bul forumnıń ótkeriliwi Ózbekstan muzıka bilimlendiriwiniń rawajlanıwın jańa basqıshqa alıp shıǵıp, sherikler menen birgelikte bilimlendiriw sistemasında zamanagóy baǵdarlar ashıw, ShBSh mámleketleri oqıtıwshılarınıń joqarı oqıw orınları arasında mamanlıǵın hám tájiriybesin arttırıw, doslıq baylanısların bekkemlew imkaniyatın bergeni menen áhmiyetli bolǵanı anıq.
…Klassikalıq muzıkanıń sıyqırlı namaları jańlaydı. Ashıq aspan astında ótkerilgen muzıkalıq ilajda jáhán hám ózbek kompozitorlarınıń eń saylandı shıǵarmaları miymanlar, kórkem óner ıqlasbentleriniń itibarına usınıldı.
Saltanatlı ilajda Ózbekstan Respublikası Prezidentiniń keńesgóyleri Abdujabbor Abduvohidov, Hayriddin Sultonov qatnastı.
Nazokat USMANOVA,
ÓzAnıń xabarshısı