Ómir – bul insanǵa berilgen eń biybaha ǵáziyne. Biraq, bul ómirdi hár kim hár túrli jasaydı. Kimlerdur jaqsılıqqa talpınıp, insanlarǵa múmkinshiligi barınsha járdem qolın sozıp, awırın jeńil etiwge háreket etedi. Insanlar arasındaǵı bunday insanıy pazıyletlerdi kórip, kewliń anaǵurlım dárejede kóteriledi hám ómirge, jasawǵa degen qızıǵıwshılıǵın jáne de artadı. Biraq tez pát penen rawajlanıp atırǵan mámleketimizde óz mápi jolında ańsat baylıq tabıwdı gózlep, nızamǵa qayshı háreketlerdi qılıp atırǵan shaxslarda joq emes.
Búgingi kúnde dúnya jámiyetshiligin qorqıwǵa salıp kiyatırǵan bul illet, ázelden jámiyet hám mámleket rawajlanıwına tosqınlıq etip atırǵan eń jaman illetlerdiń biri bolıp tabıladı. Ǵárezsizligimizdiń dáslepki kúnlerinen baslap, mámleketimizde demokratiyalıq huqıqıy mámleket hám kúshli puqaralıq jámiyeti qurıwdıń ulıwma strategiyasın ámelge asırıw sheńberinde, nızam ústinligin támiyinlew, puqaralardıń huqıq hám erkinliklerin qorǵaw boyınsha bir qatar is-ilájlar ámelge asırıp kelinbekte.
Prezidentimiz de óz sózlerinde aytqan edi:
-Reformalarımız nátiyjesi kóp tárepten korrupciyaǵa qarsı qatań gúresiwge baylanıslı. Korrupciyaǵa qarsı gúresiw hár birimizdiń tiykarǵı wazıypamız.
Korrupciya bálesinen qutılıw, reformalardı onıń sheńgelinen qutqarıw hár birimizdiń adiwli minnetimiz bolıp tabıladı. Biz isenemiz kún kelip korrupciya pútkilley joq bolıp mámleketimiz bunnan da joqarı dárejelerge erisedi. Bunıń ushın bárshemiz bir tán- bir jan bolıp gúresip, elimiz rawajlanıwı jolında belsendilik kórsetiwimiz tiyis. Milliyligimizge jat bolǵan bunday illetlerden awlaq bolayıq. Óytkeni erteńgi aydın keleshek búginnen baslanadı. Bul jat illetke búgin yamasa erteń emes bálim házir-aq shek qoyıń.Óz keleshegińiz óz qolıńızda!
Sh.Baltabayeva
Qońırat rayoni Ádillik bólimi
Mámleketlik xızmetler orayı jetekshi
qánigesi