Ǵárezsizlik jıllarında ullı tarıyxımız, bay miyrasımız, múqáddes dinimiz, úrp-ádet hám dástúrlerimiz qayta tiklendi. Búgingi kúnde mehir-múriwbet, keńpeyillik, awızbirshilik sıyaqlı pazıyletler, milliy hám ulıwma insanıylıq qádiriyatlarǵa húrmet, Watan táǵdiri hám keleshegine baylanıslılıq sezimleri júregimizdiń túp-túbinen orın aldı.
Ǵárezsizlik jıllarında kóp milletli xalqımız óziniń ullı qádiriyatları, bekkem sabırın kórsete aldı, awır sınaw hám mashaqatlardı márdana jeńip, úlken rawajlanıw jolın basıp ótti.
Sońǵı jıllarda ámelge asırılıp atırǵan reformalar nátiyjesinde, ásirese 2017-2021-jıllarda Ózbekstan Respublikasın rawajlandırıwdıń bes áhmiyetli jónelisi boyınsha Háreketler strategiyasın ámeliyatqa engiziw tiykarında mámleketimizdiń siyasıy huqıqıy, social-ekonomikalıq, ruwxıy-aǵartıwshılıq ómirin túpten jańalaw, «Milliy tikleniwden milliy – rawajlanıwǵa qaray!» ideyasın keń úgit-násiyatlaw barısında biraz jetiskenliklerdi qolǵa kirgizip kelmekte.
Dúnya júzinde dawam etip atırǵan basqa túrli qáwiplerge qaramastan, xalqımızdıń ǵárezsiz rawajlanıw jolındaǵı ámeliy háreketleri dawam ettirilmekte. Jámiyetimizde tınıshlıq, erkinlik, puqaralar hám milletler ara tatıwlıq ortalıǵı bekkemlenbekte. Jańa Ózbekstandı qurıw maqsetinde keń kólemli reformalar, ómirimizdiń barlıq tarawların erkinlestiriw, ekonomika hám onıń tarmaqların, jeke isbilermenlikti jedel rawajlandırıw barısında úlken ózgerisler ámelge asırılmaqta. Sonday-aq, xalıqtıń sociallıq járdemge mútáj qatlamların hár tárepleme qollap-quwatlaw, kambaǵallıqtı qısqartırıw, jańa jumıs orınları hám dáramat dereklerin jaratıwǵa óz-aldına itibar qaratılmaqta.
Ózbekstan Respublikası mámleketlik Ǵárezsizliginiń otız bir jıllıq basıp ótken rawajlanıw jolın, mámleketimizde ámelge asırılıp atırǵan jańalanıw járayanların tereń talqılaw arqalı aldımızda turǵan áhmiyetli wazıypa – ata-babalarımızdıń bay hám milliy ruwxıy miyrasın úyreniw hám keń úgit-násiyatlaw, Ózbekstannıń jańa rawajlanıw dáwiri ushın bekkem tırnaq jaratıw barısındaǵı belgilep berilgen uzaq múddetli strategiyalıq wazıypalar sheńberinde milliy ideyanı rawajlandırıwǵa qaratılǵan háreketlerimizdi jáne de kúsheyttiriwden ibarat.
Bıyıl xalqımız neshe júz jıllıq tarıyxı dawamında arzıw etip, umıtılıp jasaǵan hám XX ásir sońında erisken, mámleketimiz ómiri hám táǵdirinde túp burılıs jasaǵan ullı waqıya – Ózbekstan Respublikası mámleketlik Ǵárezsizligi járiyalanǵanlıǵına otız bir jıl toladı. Ǵárezsizlik bayramı – bul qutlı kúnniń quwanıshı neshe jıllar ótse de qádirin joǵaltpaydı.
Ǵárezsizligimiz mángi bolsın!
J.Óserbaev
Respublika Ruwxıylıq hám aǵartıw orayı
Qońırat rayonlıq bólimi baslıǵı