Ózbekstan Respublikası Prezidentiniń «Ózbekstanda insan huqıqları tarawındaǵı milliy bilimlendiriw baǵdarlamasın tastıyıqlaw haqqında»ǵı qararına muwapıq, 2023-jıldıń 20-28-fevral kúnleri «Insan huqıqları hápteligi» ótkeriliwi belgilengenlgine baylanıslı, Qońırat rayonı Ábu Ali Ibn Sino atındaǵı jámáát salamatlıǵı texnikumında ushırasıw shólkemlestirildi.
Qararǵa muwapıq, Qaraqalpaqstan Respublikası sudlarınıń sudyaları tárepinen Jaslar isleri agentligi, prokuratura, ádillik ministrligi hám basqa da birge islesiwshi shólkemler menen birgelikte máhállelerde «Insan huqıqları – joqarı qádiriyat» atamasında sudya hám jaslar ushırasıwları, «Jańa Ózbekstan hám insan huqıqları» atamasında «Informaciya saatı» hám «Aǵartıwshılıq saatı» ilajları ótkerilmekte. Gezektegi ushırasıwlar Qońırat rayonı Ábu Ali Ibn Sino atındaǵı jámáát salamatlıǵı texnikumında shólkemlestirildi.
Onda Qońırat rayonı ekonomikalıq, jınayat hám puqaralıq isleri boyınsha sudları baslıqları, rayonlıq Ádillik bólimi hám Jaslar isleri agentligi Qońırat rayonlıq bólimi baslıqları shıǵıp sóylep, elimizdegi insan huqıqların támiyinlew baǵdarında ámelge asırılıp atırǵan jumıslar haqqında maǵlıwmatlar berildi.
Atap ótilgenindey, Ózbekstanda insan huqıqların támiyinlew, qorǵaw hám oǵan boysınıw máseleleri mámleketlik siyasattıń áhmiyetli baǵdarlarınan esaplanadı. Insan huqıqları boyınsha Ózbekstan Respublikasınıń Milliy strategiyası sheńberinde jeke, siyasiy, ekonomikalıq, sociallıq hám mádeniy huqıqlardı támiyinlew boyınsha maqsetli ilajlar ámelge asırılmaqta.
2020-2024-jıllarda insan huqıqları tarawındaǵı Jáhán bilimlendiriw baǵdarlamasınıń tórtinshi basqıshı ámelge asırılmaqta. Usı basqısh jaslardı teńlik, insan huqıqlarına ámel etiw hám kemsitpew ruwxında tárbiyalaw hám inklyuziv, tınısh jámiyetti jaratıwǵa múmkinshilik beriwshi bilim beriwge qaratılǵan.
Sonday-aq, Ózbekstan Respublikası Prezidentiniń 2023-jıl 7-fevral kúngi PQ-46-sanlı qararı tiykarında Insan huqıqları tarawındaǵı Milliy bilimlendiriw baǵdarlaması hám onı ámelge asırıw boyınsha «jol karta» tastıyıqlandı.
Baslı maqset – BMSh nıń Insan huqıqları tarawında bilimlendiriw hám tárbiya haqqındaǵı Deklaraciyasınıń qaǵıydaları hám insan huqıqları tarawındaǵı Jáhán bilimlendiriw baǵdarlamasınıń tórtinshi basqıshın ámelge asırıw bolıp esaplanadı. Sonday-aq, xalıqtıń insan huqıqları menen erkinlikleri haqqındaǵı milliy hám xalıqaralıq standartlar boyınsha xabardarlıǵın arttırıwdan ibarat.