Айни кунларда жойларда Олий Мажлис Қонунчилик палатаси депутатлари ўзлари сайланган ҳудудларда сайловчилари билан учрашмоқда. Қонунчилик палатаси депутати Гулжан Халмуратованинг ҳам сайловчилар билан учрашувининг навбатдаги манзили энг чекка туманларнинг бири бўлган Қўнғирот туманида ташкил қилинди. Халқ вакилининг дастлабки манзили ижтимоий соҳа объектларидан бири бўлган Қўнғирот туманида янгидан қад кўтарган икки қаватли тиббиёт клиникасининг очилиш маросими бўлди.
Очилиш маросимида мамлакатимизда кейинги йиллари барча соҳалар сингари тиббиёт соҳасига қаратилаётган эътибор, энг бебаҳо бойлигимиз бўлган саломатликни мустаҳкамлаш, айниқса аҳолининг саломатлигини мустаҳкамлаш йўлида қилинаётган ишлар ва энг чекка туманларнинг бирида айнан бу каби замонавий биноларнинг қад кўтарилиши бир томондан аҳоли саломатлигини мустаҳкамлашда ва ишсиз юрган халқни иш билан таъминлашда муҳим аҳамият касб этишини таъкидлаб ўтилди. Бундан ташқари, депутат Гулжан Халмуратова кенг жамоатчилик вакилларини муборак Рамазон ойи билан самимий табриклаб, барча эзгу тилакларини билдириб ўтди.
Сўнг халқ вакили мазкур марказда беморлар учун яратилган қулайликлар, тиббиёт ходимларининг иш фаолияти ҳамда марказнинг тиббий техник базаси билан танишиб чиқди.
Ўрганишлар давомида тиббиёт масканига қўшни Қонликўл ва Шўманой туманларидан ҳам келиб замонавий Узи аппаратларидан текширувдан ўтаётгани эътироф этилди.
Халқ вакилининг кейинги манзили “Таллиқ” маҳалла фуқаролар йиғини бўлди.
Маҳалла аҳли билан бўлган самимий суҳбат жараёнида депутат мамлакатимизда аҳоли фаровонлигини таъминлаш, тинчликни асраш, ҳар бир хонадон, фуқаро билан ишлаш борасида амалга оширилаётган чора-тадбирлар тўғрисида маълумотлар берди.
Бундан ташқари аҳолини қийнаб келаётган муаммолар бўйича уларнинг мурожаатлари, фикр ва таклифлари ҳам тингланди.
Сайловчиларнинг ҳудуддаги ичимлик суви, суюлтирилган газ, электр энергияси, ички йўлларни таъмирлаш, бандлик каби ўндан ортиқ мурожаати тингланди ва мутасаддилар иштирокида атрофлича муҳокама қилинди.
Депутат томонидан аксарият муаммолар шу ернинг ўзида туман Кенгаши депутатлари, маҳалла еттилиги ва тегишли соҳа вакиллари билан биргаликда муҳокама қилиниб, ичимлик сув муаммоси жорий йил дастурга киритилиши ва йил якунига қадар ижобий ҳал қилиниши, ички йўлларни таъмирлаш масаласи туман Ободонлаштириш бошқармаси билан биргаликда ҳал этилига келишиб олинди.
Учрашув давомида депутат ва маҳалла ўртасидаги ўзаро ҳамкорлик доимий тарзда амалга оширилиши лозимлиги ва аҳолининг биронта мурожаати эътибордан четда қолиши мумкин эмаслиги таъкидланди.
Шунингдек, қонунчилик палатаси депутати Гулжан Халмуратова туман Кенгаши депутатлари билан ҳам учрашди.
Мулоқотлар чоғида партиянинг маҳаллий Кенгаш депутатлари фаолиятини кенгайтириш, жамоатчилик назорати тадбирларини кучайтириш, ижтимоий соҳалардаги муаммо ва камчиликларни бартараф этиш масалалари муҳокама қилинди.
Шунингдек, ўрганишлар жараёнида фуқаролардан келиб тушаётган мурожаатлар асосида сессияларга масалалар киритиб бориш, депутатлик сўровларини ташкил этиш каби бир қатор масалалар ҳам эътибордан четда қолмади.
Гулжан Халмуратова томонидан мазкур йўналишлар бўйича фаолликни оширишга қаратилган бир қатор таклиф ва тавсиялар берилди ҳамда Кенгаш фаолиятини жадаллаштириш юзасидан устувор вазифалар белгилаб олинди.
