Qońıratta jaslar menen islesiwde jańasha jantasıwlar, ilajlar ámelge asırılmaqta. Sonıń menen birge, olardıń mashqala hám usınısların úyreniw, bántligin támiynlew maqsetinde jaslar menen ushırasıwlar ótkerilmekte.
Qońırat rayonı hákimligi májilisler zalında hákim orınbasarları, mekeme, shólkem basshıları qatnasıwında ótkerilgen “Basshı hám jaslar”ushırasıwı áne usınday ilajlardan biri boldı.Ulıwma orta bilim beriw hám kásip-óner mektepleri pitkeriwshileri, joqarı oqıw orınları studentleri, kórkem óner, mádeniyat hám sport tarawlarında joqarı nátiyjelerdi qolǵa kirgizgen jaslar bir mánzilge jám boldı. Ushırasıwda jaslardıń bántlik, jeńillikli kreditler alıw, isbilermenlik iskerligin keńeytiw, diyxanshılıq ushın jer ajıratıw máseleleri boyınsha múrájatları tıńlandı. Sonday-aq, kásip- ónerge hám shet tillerine oqıtıw,isbilermenlikke tartıw arqalı bántligin támiyinlew máseleleri de sóz boldı. Ushırasıwdıń ayrıqsha tárepi sonda, basshılar ushırasıw dawamında basıp ótken ómir jolları haqqında aytıp, jaslarǵa motivaciya berdi. Maqset – jaslardıń intelektual bilimli hám intalı insanlar bolıp jetilisiwi hám turmısta óz ornın tabıwına kómeklesiw.
