Бүгин Өзбекстан Республикасы Шаңарақ ҳәм ҳаял-қызлар мәмлектлик комитети баслығының орынбасары Н.Эгамбердиева хызмет сапары менен Қоңырат районында болды. Район ҳәкимлиги мәжилислер залында район ҳәкими Б.Мадаминов ҳәм Қарақалпақстан Республикасы Министрлер Кеңеси Баслығының орынбасары – Шаңарақ ҳәм ҳаял-қызлар комитети баслығы М.Ахмедовалар менен биргеликте сектор басшылары, мәкеме-шөлкем басшылары ҳәм мәҳәллелердеги ҳаял-қызлар белсендилери менен ушырасты. Ушырасыўда ҳаял-қызлар менен байланыслы ҳәм шаңарақлардағы социаллық орталыққа унамсыз тәсир етиўши жағдайлар, олардың алдын алыў бойынша жуўапкер мәкемелердиң өзара байланысы ҳәм ҳаял-қызлардың мүрәжатлары менен ислеў системасын жетилистириў мәселелери бойынша пикир алысты.
Соның менен бирге, ҳаял-қызлар белсендилери тәрепинен социаллық хызметлерди мәҳәллелерде шөлкемлестириў ис-илажлары, ҳаял-қызлар белсендилери тәрепинен шаңарақлар ҳәм ҳаял-қызлар арасында руўхый-ағартыўшылық илажларын алып барыў, ғалабалық спорт илажларын өткериў, жәмийетшилик шөлкемлер жумысларын нәтийжели шөлкемлестириў бойынша көрсетпелер берди.
Буннан соң Ҳаял-қызларды реабилитация қылыў ҳәм бейимлестириў орайы, районлық ПҲАЖ бөлими ҳәм ҳаял-қызлар исбилерменлик орайларында болып, ҳаял-қызлар ушын жаратылған шараятлар менен танысты ҳәм ҳаял-қызлардың мүрәжатларын тыңлады. Соның менен бирге елимизде ҳаял-қызлардың ҳуқықлары ҳәм нызамлы мәплерин қорғаў, олардың бәнтлигин тәмийинлеў бағдарында әмелге асырылып атырған жумыслар бойынша кеңнен түсиниклер берди
Сапардың тийкарғы мақсети Қоңырат районындағы ҳаял-қызлар мәселелерин үйрениў, анықланған машқалаларды сапластырыў ҳәм ҳаял-қызлардың бос ўақытларын мазмунлы өткериўин тәмийинлеў ушын ҳәр қыйлы мәдений илажларды шөлкемлестириўден ибарат.
Қоңырат районы ҳәкимлиги Мәлимлеме хызмети