Sońǵı jıllarda mámleketimizde Húrmetli Prezidentimizdiń baslaması menen ruwxıy-aǵartıwshılıq hám mámleketlik tillerimizge bolǵan itibar kúsheydi.
Atap aytqanda, mámleketlik tillerimizge tiyisli bir neshe Párman hám Qararlar qabıl etildi, taǵı da wazıypalar belgilep berildi.
Joqarıdaǵılardıń ayqın dálili sıpatında mámleketlik til haqqında, ózbek hám qaraqalpaq tillerine tiyisli kóp tomlıq túsindirme sózlikler, ózbek hám qaraqalpaq tillerindegi is júrgiziw kitabı, hár bir tarawǵa tiyisli terminlerdiń túsindirme sózlikleri bólek kitap formasında baspadan shıqtı hám bul jumıslar dawam etpekte. Taǵı da jańadan “Ózbekshe-qaraqalpaqsha sózlik” kitabınıń baspadan shıqqanı is hújjetler menen islesetuǵın xızmetkerlerge bir qansha jeńillik jarattı dep biymálel ayta alamız.
Hárip hám sózlerdiń tuwrı jazılıwı, aytılıwı hám orın atamaları keltirilgen bunday túsindirme sózlikler tek ǵana ózbek yamasa qaraqalpaq xalqı ushın emes, al ózbek hám qaraqalpaq tillerin úyreniwshiler ushın da qollanba wazıypasın atqaradı.
Qońırat rayonındaǵı “Jaslar orayı”nda jańadan baspadan shıqqan 40 tan aslam mámleketlik tillerimizge tiyisli kitaplardı keń jámiyetshilikke tanıtıw maqsetinde úlken “Kitaplar menen tanıstırıw” ilajı bolıp ótti. Ilajda sóz etkenler xalqımızdı, jaslarımızdı tilimiz, ádebiyatımız, bay mádeniyatımız, milliy úrp-ádetlerimizdiń saqlanıp qalıwına óz janların pidá etken, ata-babalarimızday óz watanına sadıq, ruwxıy dúnyası bay áwladtı tárbiyalawda hár bir insan óz úlesin qosıwı kerek dep tómendegishe pikirlerdi aytıp ótti.
Xalqımızdı kitapqumarlıqqa shaqırıw bul hár birimizdiń wazıypamız bolıwı kerek. Kitap – biybaha ǵáziyne. Insan ushın ol jaqın joldas, dos, másláhátshi hám ustaz bolıp tabıladı. Kitap oylaw deregi bolǵanı ushın da xalqımız onı nanday áziz hám muqaddes dep biledi. Jáne de insannıń dúnyaǵa kózqarasın, oy-órisin keńeytiwshi, insandı kámillikke jeteklewshi nárse, bul álbette, kitap sanaladı.
Álbette, ruwxıy-aǵartıwshılıq tarawında ámelge asırılıp atırǵan jumıslardıń barlıǵı ósip kiyatırǵan jaslarımızǵa tuwrı jol kórsetse, ómirde adasqan ayırım jası úlkenlerimizdiń tuwrı jolǵa qaytıwına imkan jaratadı.
R.Aybergenova, Qońırat rayonı hákim másláhátshisi
