Búgingi kúnde Respublikamız boylap barlıq aymaqlarda Húrmetli Prezidentimizdiń Respublika Ruwxıylıq hám aǵartıwshılıq Keńesi májilisinde bildirgen pikir, usınısları, jańa baslamalar hám belgilep berilgen wazıypalardıń áhmiyeti haqqında keń túrde úgit-násiyat jumısları alıp barılmaqta.
Bul májilistiń tiykarǵı maqsetin alıp qaraytuǵın bolsaq, jámiyette sociallıq ruwxıy ortalıq turaqlılıǵın támiyinlew, milletler aralıq tatıwlıqtı bekkemlew keleshek áwladtı Watansúyiwshilik ruwxında tárbiyalaw, taǵı da hár qıylı jat illetlerge erip ketiwiniń aldın alıw bolıp tabıladı.
Sonday eken, insandı ruwxıy jaqtan bay etip tárbiyalaw ushın tálim hám tárbiyanı teńdey etip alıp barıwdı hár bir adam óz aldına baslı wazıypa etip qoyıwı kerek. Tálim hám tárbiyani tekǵana mektep, yamasa mektepke shekemgi bilimlendiriw mákemelerinde emes, bul shańaraqtan, bala ana qarnında payda bolǵannan baslanıwı zárúr. Sonıń menen birge, insanlar ruwxıy dúnyasın ómiri dawamında bayıtıp, jaqsılıq etiwge umtılıp barıwı lazım. Adam balası bilimli, ilimli alım bolıp, ruwxıy jaqtan dúnyaǵa kóz qarası tómen bolsa, hesh bir tarawda joqarı insanıylıq pazıyletlerdi jámiyetke, sonday-aq, dógeregindegi insanlarǵa shasha almaydi, kerisinse jaman illetlerdiń tamır atıwına sebepshi boladı. Sonıń ushın Prezidentimiz “Mánawiyat hár qanday tarawdan on adım aldında turıwı kerek”,- dep biykarǵa aytpadı. Sol sebepli házirgi kúnde dúnyada júz berip atırǵan waqıyalar artında da insannıń ruwxıy dúnyasınıń tómen ekenliginen dep bilemen.
Sońǵı waqıtlarda jas áwladtı, qalaberse orta jaslı jası úlkenlerimizdi de virtual dúnya tárbiyalap atırǵanlıǵınıń guwası bolamız. Joqarıda aytıp ótkenimizdey tárbiya shańaraqtan baslanadı. Házirgi waqıtta adamlar telefon ishine “kirip ketiw” nátiyjesinde kóplegen shańaraqlarda tınıshsızlıq kelip shıǵıp, shańaraqlardıń buzılıp ketiwine sebepshi bolıp atır. Bunday shańaraqta tárbiya alǵan bala keleshekte tárbiyalı, bilimli insan bolıp jetisedi dep kim kepillik bere aladı. Húrmetli Prezidentimiz Keńes májilisinde biykarǵa jádid babalarımızdı eske almadı. Bul babalarımız elimizdiń tınıshlıǵı jolında, bay mádeniyatımız, tilimiz, ádebiyatımız, dinimiz, milliy úrp-ádetlerimizdiń saqlanıp qalıwına óz janların pidá etken. Usı ata-babalarimızday óz watanına sadıq, ruwxıy dúnyası bay áwladtı tárbiyalawda hár bir insan óz úlesin qosıwı kerek.
Joqarıdaǵı pikirlerden kelip shıǵıp, insan zatınıń “Alım bolıwı ańsat, adam bolıw qıyın” ekenligin túsinip jetiwi de úlken jetiskenlik dep bilemen.
Qońırat rayonı hákiminiń
másláhátshisi Rano Aybergenova