Búgin Nókis qalasınan respublikamız rayonlarındaǵı 720 dan aslam ulıwma bilim beriw mektepleri ushın «Kitaplar kárwanı» jolǵa tústi.
Ilajǵa qalalıq hám rayonlıq xalıq bilimlendiriw bólimleriniń juwapker xızmetkerleri, tiyisli taraw basshıları qatnastı.
Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov, Xalıq bilimlendiriw ministri R.Reymov hám basqalar shıǵıp sóylep, ótkerilip atırǵan ilajdıń áhmiyetine ayrıqsha toqtap ótti.
Atap ótilgenindey, Qaraqalpaqstan Respublikası Joqarǵı Keńesi Prezidiumınıń 2022-jıl 29-mart kúngi «Ulıwma bilim beriw mektepleriniń kitapxana fondların ádebiy kitaplar menen támiyinlew maqsetinde olarǵa qarjı ajıratıw haqqında»ǵı qararı qabıl etilgen edi.
Usı qararǵa muwapıq, baspa hám sawda mákemeleri tárepinen usınıs etilgen ádebiy kitaplardıń oqıwshılardıń jas ózgesheligine sáykesligi hám mektep oqıwshılarınıń paydalanıwına jaramlılıǵı úyrenip shıǵılıp, ádebiy kitaplardıń ulıwma bilim beriw mektepleri fondına bólistiriliwi Xalıq bilimlendiriw ministrligi tárepinen islep shıǵılǵan bólistiriw kestesi tiykarında ámelge asırıldı.
Ilajda qalalıq hám rayonlıq xalıq bilimlendiriw bólimlerinen kelgen wákillerge, jámi 50 atamadaǵı 58 mıńnan aslam kitap tapsırıldı hám kárwan jolǵa tústi.
Á.Jiemuratov,
Qaraqalpaqstan xabar agentligi