Insán máplerin támiyinlew ushın eń aldı menen xalıq penen sáwbetlesip, olardıń ómirlik másele hám mútájliklerin jaqsı biliw ayrıqsha orın iyeleydi.
Álbette bul xalıqtıń jasaw sapasın hám biznesti rawajlandırıwdıń imkaniyatın beredi. Usılardan kelip shıǵıp xalqımızǵa tek oray arqalı emes bálkim orayǵa keliw imkaniyatı bolmaǵan alıs awıllar hám posyolkalarda jasawshı puqaralarǵa kóshpeli xızmetlerdi kórsetiw ushın oraylarımız «Damas» avtotransportı menen támiyinlengen.
Sonday-aq, Qońırat rayonı orayınan 360 km uzaqlıqta jaylasqan «Qaraqalpaqstan» PPJda shólkemlestirilgen oray shaxabshası puqaralar ushın jaratılǵan jáne bir qolaylılıq boldı desek adaspaǵan bolamız. Puqaralardı sociallıq qorǵaw, huqıqıy járdem beriw maqsetinde, Qońırat rayonı Ádillik bólimi Mámleketlik xızmetler orayı qániygeleriniń bul saparı da Qaraqalpaqstan PPJ da bolıp ótti.
Posyolka turǵınlarına talap eń joqarı bolǵan xızmet túrleri yaǵnıy: kadastr pasportı, kóshpes múlk, balalar baqshasına arza beriw, arxiv maǵlıwmatların alıw boyınsha jámi 50 den aslam mámleketlik xızmetler kórsetildi 2 yuridikalıq karxana mámleketlik dizimnen ótkerildi. Mámleketlik xızmetler kórsetiw menen bir waqıttıń ózinde mámleketlik xızmetlerden onlayn túrde, mobil versiyalar arqalı paydalanıw boyınsha túsinik jumısları alıp barıldı.Kórsetilgen kóshpeli xızmetler nátiyjesinde posyolka turǵınlarınıń bir qansha waqtı hám áweregershiliginiń aldı alındı.Puqaralar búgin oraylarımız tárepinen kórsetilip atırǵan bunday xızmetlerden sheksiz minnetdar!
Juwmaqlastırıp aytatuǵın bolsaq búgin azat xam abat jurtımızda jasap, hár qashanǵıdanda kóbirek kúsh-jiger, ǵayrat penen islep xalqımızǵa elede qolaylı hám sapalı xızmet kórsetiwde, elimizdiń bunnanda gúllep jasnawına óz úleslerimizdi qosıwdı dawam etemiz.
Sh.Baltabayeva
Qońırat rayonı Ádillik bólimi
Mámleketlik xızmetler orayı
qaniygesi